(1894) De Teresina á Xico
Queridu Xico del alma: la to carta dexome per entristecia y desconsolada, y po lo que en ella me dices, van vertiendo los mis güeyos más llágrimes, que sidre pingaron esti añu los llagares de la rodiada.
Estás conmigo duru y ofensible; dícesme que non t'agradecí migaya les fatigues que tienes pasao por veme; que me emperexilé co' les flores del to huertu, sin que nunca te diera les gracies; que non sentí la to marcha y que vas ver si axuntes muncha plata, porque crees que el dineru tou lo ablandia y pa remachar el clavu, acabes diciendo que vas facer la to sepoltura á la vera de mi casa, con un lletreru enriba, diciendo onde te mató una ingrata.
Después que leí tantes coses me eches en cara, salí de casa como una lloca y non aparé hasta Peña Furada, que ye el sitiu onde tantes veces tengo dío á esperate; cuando me vi allí sola, dime á apellidar cuantu pudi faciéndoyos el son á les foles, que por ciertu eren cada vez más grandes, acasu porque les mios llágrimes diben aumentándoles.
Tres dis arreu, con tres noches, estuvi en aquel disiertu cavilando y discurriendo en que te pudi faltar, pa que me tratares tan mal, llamándome ingrata y desgradecía. Si non ye po la xente del mio llugar, que me quier como yo non merezco, creo, Xico, que allí me muerro esperando por ti; pero como los vecinos estuvieron tres dis sin veme, pensaron que algo me pasaba y echáronse a buscame por toes partes, hasta que me toparon sentada á la veriquina de les foles y dicen - porque yo non me doy cuenta de nada, - que estaba colos güeyos arremellaos y mirando pa la Habana.
Lleváronme d'alli casi á rastres y toos me preguntaben qué era lo que tenía; entós saqué del seno la tu carta y enseñéyosla. Cuando la leyeron plasmaron, Xico, plasmaron viendo la desinjusticia conque me trates; porque ellos saben lo que yo te quiero y el gustu que tengo en poneme maja co les tos flores y saben tamien lo contenta que estoy cuando te tengo á mi vera; porque tú defiéndesme de les males llengües que anque, por fortuna, son poques les que hay en llugar, hay bastantes forasteres que, non perdonen mediu de ofendeme, levantándome llevantos, y roéndome la honra, llevando su mal querer hasta el extremu de faltate a ti tamien, non más que por mortificame á min.
Los vecinos toos, trataron de consolame y convenceme de que el tu enoxu, non fué más que por provocame y por saber hasta onde llega el mio cariñu. Podrá ser verdá lo que me dicen, Xico, pero yo mientres non vea aquellos ringloninos piquiñinos en que con tan poques palabres dices tantes coses y tan guapes, tengo que estar triste y desconsolada y la zozofra y la inritación tienen que quitame los dis de la vida, si tu non tienes compasión de min.
Volvi, volvi de la Habana lluego, anque vólvies sin una perra, porque bien sabes que non ye el dineru lo que ablandia toos los corazones; el miu ye pa ti como una mantega, bástame el to cariñu, y un paxiquin de flores del to huertu, agradézcolu más, que los millones de Butrón, que anque non me vendrin mal, non los quixera si me habin facer tan desgraciá como lu facen á elli.
Voy dexate por hoy, pero antes quiero preguntate una cosa.
Dime, Xiquin, ¿quedarás convenciu de que la to Teresina, non ye ingrata, nin pueed selo co'l hombre que más quier en isti mundu? Por Dios me lo digas pa mi tranquilidad y pa la de toa esta xente que goza coles mis alegríes y sufre co les mios penes.
Adios Xico, hasta que te acuerdes de la que más te quier en mundu ye la to
Teresina